Archive pour la catégorie 'TONONKALON’I DadaRabe'

NDAO HIARAKA ISIKA !

10 mai, 2017

NDAO HIARAKA ISIKA !

Tsy hoe kiry akory na koa hoe hadalana
No mahatonga antsika handao ity tanàna,
Fa noho ilay andraikitra ary koa ilay adidy,
Tsy an-tery akory izany fa tena efa safidy !

Tsy maintsy tapa-kevitra fa ady ny fiainana !
Tsy asiana fendrofendro, tsy asiana fitarainana
Fa raisina mavitrika, amin-joto ihany koa…
Ariana ny hakamoana ary hiezaka amin’ny fo !

Tsy hiandry fahagagana na hiandry olon-kafa,
Tsy hiandrandra fanjakana na hanantena rasa
Fa vonona isika, handresy fahantrana…
Hifofotra, hikofoka, tsy hanaiky fandraràna !

Fa samy mba mitady ny anjarany eto an-tany,
Tsy maintsy ho bedaina sy rombahina izany !
Fa samy mba mikatsaka ny taratra masoandro…
Tadiavina, katsahina, rombahina io vao azo !

Ho anao tsy mbola vonona…Aleo ‘zahay handroso !
Izahay tsy hiandry anao fa dia tena hisosososo !
Tsy hahalala menatra, hivandravandra maso !
Harodanay ny lahatra, hadabokay ny ankaso !

Ka dia veloma ihany ! Masina ry zareo !
Fa lasa izahay ! Tsy hitomany, tsy hitoreo !
Ny lanitra no iombonana sy hitahy ihany koa…
Fa ny eto an-tany kosa samy hitady izay mahasoa Ndao hiaraka isika !

DadaRabe
Ambato
09/05/17 23 :26

TONTOLO INTERNETY

13 février, 2017

TONTOLO INTERNETY

Tontolo vaovao, tontolo ifandraisana,
Nahalalako anao…eny tsy nampoiziko
Fa sehatra iray, tontolo mba iraisana…
Nanjary tena tiako, nanjary nankafiziko !

Tontolo toy ny nofy kanefa tena izy,
Toa lavitra ny any, toa sarisary ihany…
Kanefa tampoka eo ‘ty fo toa mihizihizy !
Fa tena tia, hono izy, ka mila anao hatrany !

Kanefa ilay tontolo, tontolo toa tsy misy,
Soratra sy sary no lamba firakofana,
Vao ts’isy ny herin’aratra dia fongana indrisy…
Manjavona tsy hita, tsy hita hosarangotina !

Kanefa anie, kanefa…Tsy nofy tsy akory
Fa tena nahalalako ilay tontolonao,
Nanjary fifaliako toa rotsy mampatory !
D’injao lasa fitiavako…ilay soratsoratrao !

DadaRabe
Ambato
12/02/17 12 :32

MIARAHABA ANAO !

3 janvier, 2017

MIARAHABA ANAO !

Lasana iny taona,
Nivalona sy dify !
Nahafaly, nampisaona,
Izay no zava-nisy…

Fa ity taona vao ity
Irina tsy hangatsiaka
Fa ho taonan’ny fitia
Hirehitra ho antsika !

Ho fanantenana,
Ho fahasambarana,
Ho fahazavana,
Ho taonam-pisantarana…

..Ny soa sy ny mamy
Ny tsara sy meva…
Ho fifaliana hatrany
No hisy sy hateza !

Ny Avo no hitahy
Antsika mianakavy,
Tsy hisy hampanahy
Fa Izy no hibaby !

Mirary fiadanana
Sy taona vaovao
Mirary ho salama…
Miarahaba anao !

DadaRabe
01/01/17 0h10
LILLE

REHEFA FILOHA AHO !

24 avril, 2016

REHEFA FILOHA AHO !

Rehefa filoha aho…

Tsy handoa ekôlazy
Izay te ho minisitra
Ary tsy ho garazin’
Ireo mazàna gisitra
Ny asam-panjakana…
Fa ny olona madio
Sy tia ny tanàna
No hitondra an’io !

Rehefa filoha aho…

Dia an’ny Malagasy
Ny harenam-pirenena
Fa tsy ho voapasipasin’
Ny ratsy tia ràn-kena
Ho any amin’ny vahiny
Ny soa sy ny tantely !
Tsy ho tompony maniry
Intsony i Gasy kely !

Rehefa filoha aho…

Dia fomba malagasy
No hampanjakaina
Fa tsy ho voatasitasin’
Ny fanjanahan-tsaina
Sy randrana avy an-dafy…
Mpiteraka krizy
Sy loza be mifafy…
Ny lohan’ny ankizy !

Rehefa filoha aho…

Dia rariny sy hitsiny
No hezahina hanjaka,
Ny maramara pitsony
Tsy hatao mahazo laka !
Ary hankasitrahana
Izay miasa sy mazoto,
Mijoro amin’ny marina…
Fa tsy ny jiolahim-boto !

Rehefa filoha aho…

Dia i ZANAHARY
No hiahy ny tany,
Hambomba tsy hanary !
Handrotsaka ny mamy !
Ary hiaraka isika,
Hikolo sy hahavita
Ny nosindrazantsika !
Handroso sy ho tafita…

…I Madagasikara…

…Rehefa filoha aho !

DadaRabe
Ambato
22/04/16 21:18

https://www.facebook.com/dadarabe/?fref=ts

TSY OHATRAN’AZY IANAO !

12 janvier, 2016

TSY OHATRAN’AZY IANAO !

(Tononkalo atolotra hampahery anao amin’izao voalohan’ny taona izao)

Tsy ohatran’azy ianao…

Fa olona mikofoka, mikatsaka ny soa,
Tsy mihondrika, mangovitra, na koa mamoy fo !
Tsy mitsiriritra foana fa mifofotra hatrany…
Mikaroka ny lalana, mitady koa ny mamy !

Fa tena efa miezaka, mazoto miari-pery,
Mitolona amin’ny fiainana, manambatra ny hery,
Tsy miandry ho tolorana, tsy miandry ny maraina…
Fa vonona hihosona ary koa hampiasa saina !

Fa ianao na dia mianjera dia miarina hatrany,
Tsy mitaraina lava na variana mitomany !
Tsy ailikao ny rihitra raha sendra ny tsy mety
Fa raisinao ny andraikitra, tsy mila hoe vedety !

Fa mandroso hatrany, hatrany, mizara hafaliana,
Ary vonona hanampy fa tsy miandry fanampiana !
Vonona hihaino fa tsy miandry foana ho henoina !
Manarina ireo namana raha sendra ka traboina !

Ianao na dia tsy manana dia mino sy matoky
Fa na dia noana androany, rahampitso mbola ho voky !
Na kely sy madinika, na bado na tsy fetsy…
Tsy miandry fandresena ianao fa miady mba handresy !

Tsy ohatran’azy ianao !

DadaRabe
Ambato
17/10/2015

https://www.facebook.com/dadarabe/?fref=ts

 

12345...10